Sa malayong katubigan ng silangan ay may isla na tinatawag na Perlas. Ang Perlas ay pinaghahatian ng dalawang pinuno: ang kalupaan na pinamumunuan ng Tigre, at ang himpapawid namang sakop ng Agila.

Ang Tigre, mabangis dahil sa kanyang impluwensya sa mga hayop sa kagubatan. Ang Agila, matayog at maliksi sa himpapawid, pero delikado kung ito ay iyong kaaway sa langit o lupa.

Ang dalawa ay kilala sa kanilang kapangyarihan at impluwensiya dahil sa pamilyang kanilang pinanggalingan.

Ang pamilya ng Tigre nagmula sa hilaga, kilala sa bagsik, kalupitan, at panloloko. Sila rin ang may hawak sa mga higanteng Buwayang kumikitil ng buhay ng mga hayop na mahuling kontra sa pamilyang Tigre.

Ang pamilya ng Agila naman ay kilala sa pagiging pranka’t marahas. Lahat ng mahuli ng mata ng mga Agilang hindi sunod sa kanilang gusto ay kanilang pinapaslang: walang rason ang tinatanggap at walang pakpak ang muling makakapagaspas kapag sila ay nahuli ng mga kawal nilang Bwitre.

Ngunit isang araw, nabigla ang mga hukbong panghimpapawid at pangkalupaan nang magkasundo ang kanilang mga lider na isantabi ang hidwaan at magkaisa.

“Agila! Humapon ka na’t magkaisa tayo upang pamunuan ang buong kapuloan. Panahon na ngayon para sa bagong lipunan, para sa Bagong Perlas!” sambit ng Tigre sa Agilang matayog ang lipad.

“Mabuti naman at naisipan mo iyan, Tigre! Handa na rin ako para sa ating matatag na pamamalakad!” saad ng Agila.

Sa kaniyang pagsang-ayon, papalapag na sana ang Agila nang bigla itong hinataw ng Tigre.

“Mga ibon! Ang pinuno ninyo ang nagnanakaw at nag-iimbak ng inyong pagkain!” sigaw ng Tigre habang tapak-tapak ang nagpupumiglas na Agila.

“Iyan ang napapala ng gahaman at mapagmataas na gaya mo, Agila!” dagdag pa nito.

“Parehas lang tayong maninila sa islang ito, kaya huwag kang magmalinis, Tigre! Ipapapatay kita sa mga kawal kong bwitre!” ika pa ng Agila habang pinipilit kumawala.

Matapos ang hidwaang ito, hindi na muling nagkasundo ang Agila at ang Tigre, gayundin ang mga hayop na kanilang nasasakupan. Ngayon, ang mga agila’t ibon ay biktima sa kagat at kalmot ng mga hayop ng lupa. Gayundin, ang mga hayop ng lupa ay isa-isang nilalaglag ng mga kawan ng ibon mula sa tuktok ng puno.

Ngayon, hindi kamalay-malay na dati, mayroong kapayapaan sa pagitan ng dalawang kaharian.