Bata, bata, ikaw ba ay nawawala?
Bata, bata, pangalan ng magulang mo’y alam mo ba?
Bata, bata, bakit ‘di ka makasalita?

Sa aking mga tenga, ako ay litong-lito
Bakit nga ba hirap na hirap ako?
Ang mga bibig nila’y tila mabilis gumalaw
Utak at galaw ko’y gustong humingi ng linaw

Paumahin kung hindi man ako makasagot
Dahil sa totoo lang, ako ay natatakot
Magulang ko’y pinuwersa sa akin ang wikang banyaga
At sa desisyon nila, ako naman ang nagdurusa

Pilit kong iniintindi ang mga salitang pinagmulan
Ngunit, unti-unting naglalaho ang larawan
Pati sa paaralan, ito’y namamayagpang tanggal
Tila nagbibigay-mensahe na ang paksa’y sagabal

Ang wikang kinagisnan ay sana muling bigkasin
At nawa’y ang salitang banyaga ay hindi na parilagin
Dahil sa bawat punit ng pahina ng kalendaryo,
Nakapirming dayuhan ang wikang Filipino

Nakatatawa, ‘di ba?
Ate, kuya, bakit ‘di ka pa rin makasalita?