Malalam ne kaya ing kutkutan ku?
Uli keng lawe ku, mapilan na la mu reng akit kung Agostu.
Mesamas na la ba reng kakung pesadya?
Metung a sampaga, adwang kandila,
Atlung salita bat keng pusung megparaya.
Dyang kapira-pirasung lugud ing ibie mu na pa,
bang kanita mipaum ya sa ing magkasakit a kaladwa.
Siguru, datang ing aldo, makirame la reng kapamilya mu.
Ing indu ampo ibpang megpakilala kanaku,
reng dara ampo bapang e sinawa keng pamanuru.
Siguradung akit ku la reng minunang menese kaku.
Mitipun la reng kekang apu, ingkung, ampo impu,
potang kasiping ku na la reng tayimik a kamaru.
Atatandanan ku inyang malati ka pa,
kayumu ning kekang tula, kasala da reng kekang mata,
potang ababatyawan mu ku keng karelang suala.
E wari meragul ka keng kawul ku?
Ot balamu e ku la man akit deng anak mu?
Mipakarine ya ba ing kekang pangane
potang ikit da reng tau ing tutu nang kule?
E ya ba mibyasa ing kekang bunsu,
potang ing turu ning pusu ku ing kayang abalu?
Bang kanita misalikut ing “pakakalulung” penibatan,
pemwersan me keng karelang piyakmulan,
ing dayang bat keng aliwang daku ning yatu,
bira me ing egana-ganang bakas ning bie ku.
Inya siguru kabaung namu pin ing manenaya kanaku.
Bakanti ya pa ing loti keng kanakung wanan,
makareserba kareng kawangis a ala nang pag-asa.
Libu-libung mamate na keng paralaya’t paroba.
Kapmu na la reng loti keng kanakung kayli.
Libu-libung mengapabureng mate na.
Menalanging malakwan ya ing memorya da —
nung ali keng tau, kareng poesya.
Makanyan man, atin ku pang kapanayan.
Nung sakaling magbalik ka keng kanitang niluguran,
kabang atin ku pang Agostung mitatagan,
ing bieng ibie mu ing kaku mung pantunan.
Buu da ka pa ring tanggapan.
Lulugud keka,
bat king kebaitan angga kematayan,
Amanung Sisuan
