Isusulat ko ang pinakamahabang tula

Tutubuan ako ng damo sa bawat bantas at ponema 

Sisiguraduhin kong malulunod ang sino mang maglalakas loob 

na hanapin ang dulo nito 

Magsusulat ako ng tulang magbibigay-daan sa akin 

sa magaspang na dila ng Angeles tuwing umaga 

Maghihintay ang trapiko sa pagdating ko 

Luluhod ang kalsada at ituturing ako nitong santo ng 

mapinong aspalto 

Hindi ko kakailanganing maglakad nang mabilis dahil may panahon pa ako para huminto 

Dahil magsusulat ako, ngingitian ako ng guard sa bawat yapak ko 

Hindi siya magtatanong kung bakit mahaba at makulay ang buhok ko 

o kung naniniwala ako sa diyos o sa demonyo

Papasok akong walang alam sa lahat ng bagay dahil pagod ako 

At sa panahong yon, sapat na rason na ang maging pagod upang tumigil ako 

Pagkatapos ng klase, hindi ako magtatrabaho dahil magpapahinga ako 

Magsusulat ako ng mga kwentong kasing kapal ng araw-araw na init 

Kasing-lamig ng aircon na ilang kilo ng kaluluwa ko ang kapalit 

Kasing-tangkad ng bahang sinusuong ko 

Ilang tikbalang na ang kinasal 

Ilang bagyo na ang dinaan sa dasal

Tuloy pa rin ang pagtuturo

Magsisilang ako ng mga salitang susubuan ako ng pagkain at 

lalagyan ako ng bubong mula ulo hanggang paa

Bubuhayin ako ng tulang gawa ko sa gitna ng kapitalistang espasyo 

sa pusod ng naghihirap na bansa

Pikit-mata akong maglalabas ng mga titik at gitling na hahawak sa pala 

upang mailibing ko lahat ng 

pagod ko at nila 

Sasamahan ako ng mga kwento at hinaing ko at papaniwalain nila akong 

may kapalit ang lahat ng ito

Na sa pagdating ng bagong delubyo 

May sukli ang lahat ng binayad ko 

Maging panibagong animnapung libo man o 

nagmamadaling ikot ng relo na walang anino

Isusulat ko ito lahat lahat, Anghelo 

Sa lilim ng pakpak ng rebulto mo 

Sa bulwagan ng panibagong bagyo 

Sa tubig mong banal 

pawis ko ang bumuo

Sa ningas ng bagong lutong Soy’s burger 

Sa dulo ng sigarilyo 

Magsusulat ako nang walang humpay bago mo patigilin 

Bago mo simulan ang sa’yo 

Magsusulat ako, oo, ng pagkahaba-habang tulang ‘di mo maririnig ang dulo 

Pero lulusong muna ako 

At sa ngayon, hindi ko pa kaya

Pa’no ko matatapos ang tula kung lumulubog pa ako

at ayaw mo munang bigyan ng pahinga?